In su mesi de austu passau Coru Sardu s’at bòfiu contai de is dificurtadis chi tenit su Tzentru trasfusionali de s’ispidali Nosta Sennora de Bonària de Santu’Èngiu, pruschetotu me is mesis de s’istadi, po sa mancàntzia de sànguini.

Su sànguini, gei ddu scieus, est essentziali po is malàdius cun talassemia, ma puru si incapitant apretus sanitàrius, po interventus chirùrgicus, po tratamentus e àteras situatzionis clìnicas. A donai su sànguini est unu protzessu seguru e beni assetiau e is personas podint donai chena cunseghèntzias po sa saludi insoru. Antzis sa cosa est profetosa po is donadoris puru ca dònnia borta ddis faint totu is anàlisis po averiguai is cunditzionis de saludi. Po custasarrexonis, su sportellu Coru Sardu,  impari a su Tzentru, e cun s’agiudu de is studiantis de su cursu adelantau “Coru sardu imparat”, at detzìdiu de cuncordai una lista de ìndicus utilosus po bessiri donadoris. Chi si fait praxeri cumpartzei su documentu chi agatais innoi asuta, cun sa spera de cumbinci cantu prus genti a cumentzai a donai su sànguini.