Aìnturu de is tzentrus chi ant a pigai a sa faina Open Week dedicada a is maladias a su coru e cuncordada de sa Fundatzioni Onda po sa Asl 6 de su Campidanu de Mesu nc’at a ai fintzas sa Strutura Cumplessa de Cardiologia e UTIC de s’Ispidali Nosta Sennora de Bonaria de Santu ‘Èngiu, chi at a essi a disponimentu po consulèntzias (a su telèfonu e in presèntzia) e bìsitas a is malàdius.

Promòviri s’informatzioni, sa preventzioni e sa diàgnosi cabudraxa de is maladias a su coru, pruschetotu s’aneurisma a s’aorta, s’antecoru e is maladias a is vàrvulas cardìacas, funt is tareas de sa Dì mundiali de su Coru, chi si tzèlebrat su 29 de cabudanni. Po custa arrexoni sa Fundatzioni Onda, po su de tres annus de sighida, cuncordat, de su 26 de cabudanni a su 2 de ladàmini, (H)Open Week est a nai una cida dedicada a is maladias de su coru, chi funt, a dolu mannu, sa càusa de morti prus manna a livellu mundiali. In Itàlia funt responsàbilis de su 35.8% de totu is mortis: 32.5% in is òminis e 38.8% in is fèminas, ca no est berus chi custas maladias ferrint mescamenti is òminis e sa majoria de is fèminas, ancora oi, no sciit calis perìgulus currit. Tocat a nai chi is maladias a su coru me is fèminas lompint prus a tardu, de dexi annus puru cunfronta a is òminis, ca fintzas a s’arrea nci funt is ormonis (pruschetotu estrogenus) a ddas amparai. Ma a pustis ndi sunfrint prus de is òminis e spissu in manera peus puru, mancai su cuadru clìnicu siat prus pagu ladinu.

Detzididori est su rolu de sa preventzioni, su stili de vida e una diàgnosi cabudraxa, pruschetotu in chi presentant fatoris de arriscu comenti su tenni familiaris chi ndi sunfrint, su essi innantis cun is annus, su pipai, su tenni sa pressioni arta, is valoris de colesterolu artus, tenni sa diabeta, pesai prus de su tanti, su fai pagu atividadi.

“Seus cuntentus, comenti a Cardiologia e UTIC, de pigai parti a custa faina de importu ca fait acostai sèmpiri de prus s’ispidali a sa genti e agiudat a prevenni is maladias a su coru”, at nau Gianfranco Delogu, responsàbili de sa Cardiologia e Utic de s’ispidali. “Custa est sa segundu borta chi ocannu seus pighendi parti a fainas de custa genia: in freàrgiu Cardiologias Abertas apariciada de s’ANMCO (Assòtziu de is cardiòlogus ospedalieris), e immoi custa. In prus. sèmpiri in su mesi de ladàmini eus a pigai parti a un’àterta faina, aprontada po totu sa Sardìnnia in Aristanis, in collaboratzioni cun sa Fundatzioni natzionali de sa Banca de su coru”.

Po consulèntzias cun su cardiòlogu a su telèfonu (070 9378423):

26/09/2023 – 27/09/2023 – 28/09/2023 – 29/09/2023 – 02/10/2023

A mangianu de is noi oras e mesu a sa una e mesu

Po consulèntzias cun su cardiòlogu in presèntzia e bìsitas serbit s’aparaguladura a su nùmeru 0709378423

Su 29/09/2023 (in s’ambulatòriu de Cardiologia in su de tres pranus de s’ispidali)

A mangianu de is noi oras e mesu a is duas